स्वास्थ्य तथा जनसंख्या मन्त्री प्रदीप पौडेलले क्यान्सर उपचारका लागि आवश्यक औषधिहरू निःशुल्क प्रदान गरिने घोषणा गर्नुभएको छ। मन्त्रीका अनुसार अन्तर्राष्ट्रिय मानविय संस्था ‘डाइरेक्ट रिलिफ’ ले प्रदान गरेको ३७ प्रकारका औषधिहरूको पहिलो खेप नेपालमा आइपुगेको छ। क्यान्सर उपचारमा प्रयोग हुने यी औषधिहरूको आपूर्ति नेपालमै सुनिश्चित गर्न संस्था डाइरेक्ट रिलिफले प्रतिबद्धता जनाएको हो, जसका कारण अब क्यान्सर उपचारका लागि बिरामीहरूलाई विदेश जानुपर्ने आवश्यक छैन। यसअघि नै मन्त्री पौडेलले यी औषधिहरू सरकारी अस्पतालहरूबाट निःशुल्क वितरण गरिने निर्णय गरिसक्नुभएको थियो।
आज ‘वन हार्ट वर्ल्डवाइड’ को सहकार्यमा नेपाल सरकारलाई डाइरेक्ट रिलिफले औपचारिक रूपमा औषधिहरू हस्तान्तरण गरेको कार्यक्रममा मन्त्री पौडेलले भन्नुभयो कि यो सहयोगले क्यान्सर बिरामीहरूलाई ठूलो राहत दिनेछ र देशमै उपचार सहज बनाउनेछ। आएको खेपमा स्तन क्यान्सर, छाला क्यान्सर लगायत विभिन्न प्रकारका क्यान्सरका लागि प्रयोग हुने औषधिहरू रहेका छन्। यो सहायता अर्का पाँच वर्षसम्म नेपालले आवश्यकता अनुसार प्राप्त गर्ने व्यवस्था गरिएको छ। मन्त्री पौडेलले भन्नुभयो, “क्यान्सर उपचार महँगो हुन्छ, जसले गरीब नागरिकहरूलाई अत्यन्त कठिनाइमा पार्छ। अब ती औषधिहरू तुरुन्तै सरकारी क्यान्सर अस्पतालहरूमा पठाउने व्यवस्था मिलाइएको छ।”
उहाँले थप भन्नुभयो कि धेरै नागरिकहरू अझै पनि सरकारको स्वास्थ्य सेवा र बीमा योजनाबारे जानकार छैनन्, त्यसैले जनचेतना अभिवृद्धिमा सञ्चार माध्यमहरूको सहयोग आवश्यक रहेको उल्लेख गर्नुभयो। स्वास्थ्य मन्त्रालयको समन्वय महाशाखाका प्रमुख डा. भीम सापकोटाका अनुसार यो सम्झौता अनुसार आगामी पाँच वर्षसम्म नेपालले औषधि प्राप्त गरिरहनेछ। वन हार्ट वर्ल्डवाइडका नेपाल प्रतिनिधि सूर्य भट्टले भने, “मन्त्री पौडेलको सक्रियताले गर्दा यो उपलब्धि सम्भव भएको हो, जुन देशको लागि महत्वपूर्ण उपलब्धि हो।” स्वास्थ्य मन्त्रालयका प्रवक्ता डा. प्रकाश बुढाथोकीका अनुसार, औषधिहरू वीपी कोईराला स्मृति क्यान्सर अस्पताल (भरतपुर), भक्तपुर क्यान्सर अस्पताल, सुशील कोईराला प्रखर क्यान्सर अस्पताल (बाँके), र वीर अस्पताल (काठमाडौं) मार्फत वितरण गरिनेछ।
स्रोत: The Rising Nepal