रिपब्लिकन सांसदहरूलाई डाक्टर, अस्पताल, र स्वास्थ्य बीमा कम्पनीहरूले हप्तौँदेखि चेतावनी दिँदै आएका थिए कि यदि राष्ट्रपति डोनाल्ड ट्रम्पको ठुलो कर तथा खर्च सम्बन्धी विधेयकको खर्च जुटाउन मेडिकेड कोष कटौती गरियो भने लाखौँ मानिसले स्वास्थ्य बीमा गुमाउनेछन् र केही अस्पतालहरू बन्द हुन सक्छन्। तर रिपब्लिकनहरूले ती चेतावनीहरूलाई बेवास्ता गर्दै अझै गहिरा कटौतीहरू गरे र जुलाई ३ मा विधेयक व्हाइट हाउस पठाए, जसलाई ट्रम्पले अर्को दिन हस्ताक्षर गरेर कानून बनाएका हुन्।

यो विधेयक पारित हुनु स्वास्थ्य उद्योगका केही ठूला पक्षहरूको दुर्लभ राजनीतिक हारको प्रतीक मानिएको छ। सामान्यतः डाक्टर, अस्पताल र बीमाकर्ताहरू एकजुट हुँदा वाशिङटनमा सबैभन्दा शक्तिशाली लबिङ समूह मानिन्छन् र यस्ता कानुनहरूलाई प्रभाव पार्न सफल हुने गर्छन्। तर यो पटक ट्रम्पको विधेयक कांग्रेसबाट मात्र दुई महिनाभित्र पारित हुँदा उद्योगका लबिस्टहरू चुपचाप क्षति मूल्याङ्कन गर्दै छन्।

लगभग सबै लबिस्टहरू सहमत छन् कि रिपब्लिकन सांसदहरू ट्रम्पको समर्थन गुमाउने डरमा स्थानीय अस्पताल वा मतदाताको आक्रोशभन्दा बढी चिन्तित थिए। उदाहरणका लागि, जब सिनेटर थोम टिलिसले मेडिकेड कटौतीको विरोधमा बोल्दा ट्रम्पले उनलाई चुनौती दिने धम्की दिए र त्यसपछि टिलिसले राजनीतिबाट अवकाश लिने घोषणा गरे।

साथै, स्वास्थ्य क्षेत्रका संस्थाहरूलाई रिपब्लिकनहरूले ओबामाकेयरको समर्थक मान्ने हुँदा उनीहरूका चेतावनीहरू बेवास्ता भएको पनि विश्लेषण गरिएको छ। अमेरिकन हेल्थ प्लान्स एलायन्सकी सीईओ सेसी कोन्नेलीका अनुसार, रिपब्लिकन सांसदहरू ट्रम्पको कर कटौती प्रतिबद्धता पूरा गर्न बढी केन्द्रीत थिए, जसले उनीहरूलाई स्वास्थ्य बीमाको सम्भावित असर बेवास्ता गर्न प्रेरित गर्‍यो।

कानुनमा केहि रियायतहरू पनि समावेश छन् —जस्तै ग्रामीण अस्पतालहरूको लागि ५० अर्ब डलरको कोष— जसले केही सांसदहरूलाई समर्थन गर्न सहज बनायो। तर कुलमा, यो कानुनले एक दशकमा मेडिकेडबाट १ ट्रिलियन डलरभन्दा बढीको कटौती गर्नेछ।

नयाँ कानूनले मेडिकेडको योग्यता वा लाभ परिवर्तन नगरे पनि, यसले राज्यहरूलाई प्रत्येक ६ महिनामा लाभार्थीको योग्यता पुनः प्रमाणित गर्न अनिवार्य बनाउँछ र ‘अटो-एनरोलमेन्ट’ प्रणाली अन्त्य गर्दछ। साथै, अधिकांश विस्तारमार्फत बीमा पाएका लाभार्थीहरूले मासिक कम्तीमा ८० घण्टा काम वा स्वयंसेवा गरेको प्रमाण पेश गर्नुपर्नेछ, जसले अनुमानित ५० लाख मानिसले बीमा गुमाउने अनुमान गरिएको छ।

यसले अस्पतालहरूलाई राज्य सरकारमार्फत बढी भुक्तानी लिनका लागि प्रयोग हुने कर प्रणालीमा पनि प्रतिबन्ध लगाएको छ, जसलाई ट्रम्प प्रशासनमा नीति सल्लाहकार रहेका ब्रायन ब्लेसले “धोखाधडी समान” करार गरेका थिए। यद्यपि, यो नियम सन् २०२८ सम्म लागु नहुने भएकाले स्वास्थ्य उद्योगले नयाँ राजनीतिक सन्तुलनपछि संशोधन गर्ने अपेक्षा राखेको छ।

ग्रामीण लुइजियानाको एक अस्पताल प्रमुख टोड एप्लरका अनुसार, यद्यपि उनीहरूले शुरुवातमा प्रस्ताव गरिएको विधेयक चाहेका थिए, अन्त्यमा ग्रामीण स्वास्थ्य कोषले सन्तुलन ल्याएको छ। “हामी जहाँ पुग्यौँ, म खुसी छु,” उनले भने।

तर यसपालि अस्पतालहरूको चेतावनीले खासै असर गरेन। अमेरिकन अस्पताल एसोसिएशनका नेतृत्वले चाँडो र कडा प्रतिक्रिया नजनाएको भन्दै आलोचना भएको छ। अर्कोतर्फ, अमेरिकी मेडिकल एसोसिएनले मेडिकेड कटौतीको विरोधमा बोले पनि उनीहरू बढी प्राथमिकतामा डाक्टरहरूका लागि मेडिकेयर भुक्तानी वृद्धिमा केन्द्रीत देखिए। तर अन्ततः सन् २०२६ का लागि मात्र २.५% भुक्तानी वृद्धि भए पनि स्थायी समाधान हुन सकेन।

राष्ट्रिय सामुदायिक स्वास्थ्य केन्द्र संघका नीतिगत प्रमुख जो डनले भने, आफ्नो संस्थाले वर्षभर कडा मेहनत गरेको थियो जसले गर्दा कम आय भएका बिरामीहरूलाई सेवा शुल्क लाग्ने प्रस्तावबाट स्वास्थ्य केन्द्रहरू छुट पाइरहेका छन्। तर अन्त्यमा अधिकांश सांसदहरूले ट्रम्पको लक्ष्य पूरा गर्न विधेयक चाँडै पारित गर्न चाहेको उनी बताउँछन्।

स्रोत: KFF Health News