नवलपुरको गैँडाकोटमा आइतवार आयोजित एक कार्यक्रममा, स्वास्थ्य तथा जनसंख्या मन्त्री प्रदीप पौडेलले बालमधुमेह (Type 1 Diabetes) को परीक्षण र उपचार निःशुल्क रुपमा उपलब्ध गराउने तयारी गरिएको जानकारी दिएका छन्। उनले बताएअनुसार, सातै प्रदेशमा यस्तो सेवा सञ्चालन गर्न मन्त्रालयले आवश्यक तयारी गरिसकेको छ। मन्त्री पौडेलले भने, “देशमा टाइप १ डायबिटीजका बिरामी बालबालिकाको संख्या बढ्दो छ। त्यस्ता वंशानुगत तथा बालमैत्री विशेष कार्यक्रम ल्याएर सरकारले ध्यान दिन जरुरी छ।” उनले पछिल्लो समय बालबालिकामा मोबाइल, टिभी, ल्यापटप जस्ता डिजिटल उपकरणको अत्यधिक प्रयोगका कारण स्वास्थ्य समस्या देखिएको भन्दै सबैलाई सचेत रहन आग्रह गरे। मन्त्री पौडेलले बालबालिका र जेष्ठ नागरिकको उपचार निःशुल्क गराउने नीतिगत व्यवस्था गर्नुपर्नेमा जोड दिंदै भने, “जनताको उपचारमा राज्यले साथ नदिने हो भने त्यो जनमुखी नहुने हो।” कार्यक्रममा नोरा हेल्थ फाउन्डेशन नेपालका कन्ट्री डाइरेक्टर डा. सुशील कोइरालाले टाइप १ डायबिटीजबारे जानकारी दिँदै भने, “यो रोगमा शरीरले इन्सुलिन उत्पादन गर्दैन, त्यसैले जीवनभर सुईमार्फत इन्सुलिन दिनुपर्छ।” नेपालमा टाइप १ डायबिटीजका ६०० बिरामी सूचीबद्ध भएको भए पनि वास्तविक संख्या अझ बढी हुन सक्ने उनले बताए। हाल नेपालका पाँच वटा अस्पतालले टाइप १ डायबिटीजको उपचार सेवा दिइरहेका छन्। डा. कोइरालाले विशेष सावधानी र सचेतनाको आवश्यकता रहेको उल्लेख गरे। विजय डिभलपमेन्ट रिसोर्स सेन्टरको ४७औँ स्थापना दिवसको अवसरमा आयोजित डायबिटीज स्क्रिनिङ कार्यक्रममा गैँडाकोट बेसिक अस्पताल र क्वेस्ट फर्मास्युटिकल प्रा.लि.ले प्राविधिक सहयोग गरेका थिए। कार्यक्रमका अध्यक्ष कृष्णप्रसाद सापकोटाले स्वास्थ्य नै सबैभन्दा ठूलो सम्पत्ति भएकाले सबैले आफ्नो खानपान र जीवनशैली सुधार गर्नुपर्नेमा जोड दिए।

स्रोत: The Rising Nepal